زعبــــــــــــــــــــــــــــلاوي.... منتدي ثقافي إجتماعي (معا نسعي لكى نتعلم )
 
زعبلاوىالرئيسيةس .و .جبحـثالتسجيلالمجموعاتدخول

شاطر | 
 

 حكومة فابريكا

اذهب الى الأسفل 
كاتب الموضوعرسالة
oso2010
زعبلاوى فعال
زعبلاوى فعال
avatar

ذكر
عدد الرسائل : 106
العمل/الترفيه : acounting
المزاج : dsfdsfdsa
تاريخ التسجيل : 14/03/2008

مُساهمةموضوع: حكومة فابريكا   30/03/08, 10:21 pm

المقال ده أنا كتبته من فترة طويلة بعد التعديل الوزاري واتنشر في كتاب البروفة العدد الثاني
حكومة فابريكا


إحنا راميين الحمل كله على الرئيس وأعوانه ورئيس الوزراء في اختيار الحكومة محدش فينا فكر يساعدهم وعايزين نطبق الديموقراطية طب ازاي.
أنا فكرت أعمل اقتراح وأقدمه يمكن يقدر يفيدهم بأي شئ وكمان الإقتراح ده مش من فراغ أو غير قائم على أي أساس أنما قائم على توجهات الدولة في الآونة الأخيرة خصوصاً الخصخصة والتطبيع وكمان المحسوبية وكثرة رجال الأعمال في الحكومة ومشاكل المواطن المختلفة زي المجاري وخوف الحكومة المتزايد على الشعب لدرجة إنها تضحي بنفسها بالذات في الآخرة فالحكومة تؤمن بمبدأ الفقراء يدخلون الجنة وبذلك فهي تعرض نفسها للعذاب في جهنم عشان الشعب يدخل الجنة شفتوا تضحية أكتر من كده .
أنا بقترح إن الحكومة تبقى بالشكل اللي هقوله دلوقتي :
رئيس الوزراء : اعتقد إن أنسب واحد يتولى المسئولية يكون بقال وده عشان عنده خبره كبيرة بعملية البيع والشراء فيقدر يبيع البلد بسهوله وأعتقد إنه هيكون أنسب واحد لتطبيق برنامج الخصخصة والإصلاح الاقتصادي .
وزارة الخارجية والري : سهل جداً إننا نعمل إدماج بين التخصصين عشان نخلي علاقتنا بالدول الأخرى دايماً طرية ومنداه بالماء أما لو زعلنا من أي دولة وقررنا نخاصمها ونشف علاقتنا بيها لحد ما تبقى زي الحديد وبعدين نرويها بالمية فتصدي ونرميها في الزبالة . وأعتقد إن أنسب واحد يقدر ينفذ البرنامج ده صاحب محل حدايد وبويات ويا حبذا إنه يكون الصديق المقرب لرئيس الوزراء عشان يسهل التفاهم بينهم .
وزارة الزراعة : أعتقد إنه أنسب واحد يتولى المسئولية دكتور في مجال الاقتصاد والعلوم السياسية وهو بذلك عنده خبرة طويلة في مجال المحاصيل والآفات الزراعية وكمان عنده القدرة على التفاوض مع الآفات الزراعية وخصوصاً دودة القطن والوصول معها لحل يرضي جميع الأطراف دون اللجؤ لاستخدام الأسلحة الكيماوية .
وزارة التطبيع : دي وزارة جديدة بس أنا شايف إنها مهمة جداً في المرحلة القادمة في علاقتنا مع العدو الصهيوني واعتقد كمان إمعاناً في التطبيع إن إحنا نجيب للوزارة واحد يهودي قصدي واحد إسرائيلي .
وزارة الإسكان والمرافق المائية : إحنا ممكن ندمج الوزارتين مع بعض عشان توجد حل للمشاكل المائية المختلفة اللي بيعاني منها الشعب سواء في مياه الشرب أو مياه المجاري . وممكن يمسك المنصب واحد سباك هيبقى عنده فكره كبيرة في تسليك البلاعات المسدودة وكمان يقدر ينفذ مشروع الدورة المائية اللي هيخلي مياه المجاري تصب في مياه النيل اللي الشعب بيشرب منه ؛ وهكذا تكون الدورة المائية من المجاري للنيل للإنسان للمجاري هكذا في دورة مغلقة .
وزارة الحرس الخاص : تحل محل وزارة الداخلية ده عشان هتسيب البلد وتتفرغ فقط لحماية الرئيس والحكومة والأعضاء البارزين في الحزب الحاكم ويقبض كمان على كل المبدعين وعلى أي واحد يفكر ويدخله السجن فورا بدون أي تهم عشان مش عايزين حد يفكر .
وزارة النقل : في الفترة الأخيرة سمعنا عن قطر الصعيد اللي إتحرق وقطر المناشي اللي غرق وطيرات بتقع وسفن بتغرق ده غير حوادث الطرق عشان كده أعتقد إن أنسب واحد يمسك الوزارة لازم يكون حانوتي عشان عنده غبرة في الغسل والتكفين ويكون من ضمن برنامجه توفير عربات الإسعاف وعربات نقل الموتى بس ياريت بلاش اللون الأحمر عشان إحنا راحين ميتم مش راحين فرح .
وزارة التبليم : تحل محل وزارة التعليم اللي أثبتت فشلها بجدارة واتضح إن ملها ش لزمة لأنها مبتعلمش حد وكل اللي يدخلها بيبلم بس فاقترح إن إحنا نسميها وزارة التبليم عشان تبقى اسم على مسمى . بس يا ترى مين يشغل المنصب الخطير ده ......... مين؟ ........مين ؟
إحنا نريح نفسنا ونمسكها لواحد من قرايب رئيس الوزراء يعني أخوه ابن خالته أي حد المهم يبقى زيتنا في دقيقنا عشان نلت فيع=ها براحتنا من غير ما حد يضايقنا .
وزارة الصحة: أعتقد أنسب واحد للوزارة دي هو حلاق الصحة بتاع زمان فاكرينه أه عشان يفكرنا بأيام الخير اللي أنا مشفتهاش أصلاً .
وعشان ينفذ الوعود الجميلة اللي الحكومة بتوعد بيها دايما مثلاً الدكتور يوزع مع كل كشف ماكينة حلاقه هديه وكان يلغي المشارط ونعمل العمليات بالموس والمقص ويظبط قفا الزبون بعد العملية ولازم يوفر الفياجرا لوزارة الحرس الخاص عشان تستخدمها كرشاوى وقت الانتخابات اللي هيكسب فيها رجال الحزب الحاكم طبعاً.
وزارة الطبل والزمر : تحل محل وزارة الإعلام وأقترح تمسك المنصب رقاصة وياريت تكون بتعرف تغني عشان تغني على الشعب بالنهار وترقص للحكومة آخر الليل عشان برده نفرج عنهم بعد المجهود الكبير اللي بيبزلوه في سبيل الشعب.
وزارة الآثار والمالية : ايه العلاقة بين الاتنين ؟ الإجابة بسيطة جداً هي إن الاتنين بيتهربوا ؛ الآثار تتهرب عشان نفقد تاريخنا والأموال تتهرب عشان الشعب يبقى فقير ويدخ الجنة حسب خطة الحكومة وأقترح إن اللي يمسكها لازم يكون واحد حرامي هيبقى عنده خبرة بالسرقة والتهريب والتهليب .
وزارة السخافة : تحل محل وزارة الثقافة . عشان الوزارة تقدر تحقق خطة الحكومة في التدني بالمستوى الثقافي للشعب وأقترح أن يكون البرنامج بتاعها إلغاء الكتب نهائياً مش عايزين حد يقرا وتخلي هلس وخبص وإسفاف وضحك على الدقون أما المتاحف فهنبيعها أو نهرب الآثار اللي فيها بمعرفة وزارة الآثار والمالية .
وزارة الشباب واستصلاح الأراضي : تخصصها إنها تودي الشباب الصحرا ويشغلوهم في السخرة ويسبوهم من غير ميه ولا أكل لحد ما يصلحوا الأرض أو يموتوا فيها . وبكده هيفيدوا البلد من كل الجوانب فلو صلحوا الأرض(لا قدر الله ) البلد هتستفيد منها ولو ماتوا هيندفنوا فيها وبعد مليون سنة إن شاء الله جثثهم تتحول لبترول يستفيد منه أحفاد أحفاد أحفادهم دا لو البلد فضل فيها حد وأعتقد إن أقدر من ينفذ البرنامج ده واحد من ضباط أمن الدولة عشان عنده خبرة كبيرة في كيفية التفنن في تعذيب الآخرين .
وزارة التموين والتجارة الخارجية: دي أهم وزارة بالنسبة للحكومة وأعتقد إن اللي يقدر يقوم بمهام النصب ده على أكمل وجه لازم يكون بياع خضار عشان يقدر يوفر الكوسة اللي بتحبها الحكومة سواء من خلال الإنتاج المحلي أو الاستيراد من الخارج المهم الكوسة تكون موجودة بكميات ضخمة جداً عشان الحكومة متقدرش تعيش من غيرها ؛ وكمان أقترح عل الحكومة إنها تشيل تمثال رمسيس وتبيعه وتحط مكانه تمثال لكوساية كبيرة وتسمي الميدان ميدان القرع .
وزارة البترول : أقترح أن يكون ضمن برنامج الوزارة توفير جركن جاز سعة 2 لتر لكل مواطن عايز يولع في نفسه وأقترح أيضا إنشاء محارق خاصة تابعة للوزارة عشان الوزارة تضمن إن المواطن هيولع في نفسه ومش هيعمل حاجة تانية بالجاز وأقترح أيضاً إنشاء محارق خاصة تعمل بالغاز الطبيعي لأبناء الطبقة الراقية وأعتقد إن أصلح شخص لهذا المنصب بياع جاز من اللي بيلفوا بعربية وحصان .
وزارة التطفيش : تحل محل وزارة القوى العاملة والهجرة ويكون البرنامج بتاعها إنها تقعد تقرف المواطن اللي ينجوا من السخرة والحرق بشتى الطرق لحد ما يطفش ويسيب البلد وكمان أي حد مسافر برة لأي سبب ميدخلش البلد تاني عشان الحكومة هتخربها وتقعد على تلها ومش عايزة حد يضايقها . وممكن ينفذ البرنامج ده بالكفاءة المطلوبة واحد من ضباط الجيش .
**ملحوظة :
أي حد شايف اختلاف بين الوزارة الفبريكا والوزارة الجديدة ياريت
يبلغني يمكن أغير رأيي .

أسامه عماره

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
mido1ayad
مشرف عام
avatar

عدد الرسائل : 174
تاريخ التسجيل : 03/02/2008

مُساهمةموضوع: رد: حكومة فابريكا   09/04/08, 07:39 pm

اولا تشكر على الموضوع لكن انا ليه راى شخصى احنا واحشين بينا وبين بعضنا المشكلة عندنا هى الضمير مش الضمير العربى لا لازم نراعى ضميرنا فى كل عمل بنعمله علشان ربنا يرضى عنا ولكن طبعا الحكومة لها دور كبير فى الموضوع دة علشان كده لازم يبقى فى تغيير فى القوانين لتكون اكثر حزما وفى الاخر مقدرش اقول اكتر من ان ربنا معانا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
حكومة فابريكا
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
زعبـــــــــــــــــــلاوى :: المكتبـــــــــــــــــــــــــة :: الأدباتيــــــــــــــــــــــــــــــة-
انتقل الى: